|
Mae llyfr newydd
a gyhoeddir gan wasg Y Lolfa yn esbonio enwau lleoedd mewn
ffordd syml, hyd yn oed i bobl sydd heb brofiad blaenorol
o’r iaith. Mae llawer o bobl, yn enwedig ymwelwyr, yn
cael trafferth wrth geisio ynganu’r iaith Gymraeg ond
gyda’r gyfrol Welsh Place-names unzipped mae Brian Davies
wedi ysgrifennu llyfr sydd yn esbonio ystyron ac ynganiadau
enwau lleoedd Cymraeg yn y modd symlaf posibl.
Ynghyd â
helpu pobl i ddeall ystyr enwau miloedd o bentrefi, trefi
a dinasoedd, dylai’r llyfr helpu pobl i ddysgu llawer
o sylfeini’r iaith, drwy ddefnyddio’r Rhestr Arbennig
o Eiriau Cymraeg sydd yn y llyfr. Yn ôl Lefi Gruffudd
o’r Lolfa: "Er nad yw’r rhestr yn esbonio pob
enw lle yng Nghymru, mae’n cynnwys y rhan fwyaf, a thrwy
ddefnyddio’r rhestr bydd modd i bobl ddehongli hyd yn
oed yr enwau hiraf ac anoddaf, fel Machynlleth a Llansainffraidglynceiriog.
Mae’r llyfr hefyd yn gymorth i ynganu, ac mae’n
esbonio’n syml a chlir y treigliadau Cymraeg."
Mae’r awdur
Brian Davies wedi bod â diddordeb mewn enwau lleoedd
Cymraeg ers ei blentyndod: "Roedd fy nhad yn cymryd pleser
mewn esbonio ystyron enwau, a’i ddehongliad a’i
gyfieithiad o ystyr Cwmrhydyceirw dros hanner canrif yn ôl
a ddechreuodd fy niddordeb mewn ystyr enwau lleoedd."
Mae’r llyfr
yn cynnwys rhan ar y wyddor Gymraeg, Hanes Cymru, treigliadau,
ynganiadau ynghyd â rhestr sylweddol o eiriau Cymraeg.
Mae’r llyfr yn rhan o’r gyfres It’s Wales sydd
yn ceisio cyflwyno gwahanol agweddau o fywyd Cymreig mewn
ffordd syml a darllenadwy. Cafodd yr awdur Brian Davies ei
eni yn Glais yng Nghwm Tawe. Mae wedi cael gyrfa fel athro
a darlithydd Ffiseg, ac mi fu’n Gyfarwyddwr Addysg a
Materion Cyhoeddus yn y Sefydliad Ffisegol.
Welsh Place-names
Unzipped
Brian Davies
It’s Wales, 7
086243 514 5
£3.95
|
