Mewn llyfr newydd ar arwyr Cymru mae'n ymddangos fod yr awdur
Alun Roberts wedi ffafrio arwyr o'r byd chwaraeon dros arwyr
o feysydd eraill. Mae'r llyfr Welsh National Heroes yn cynnwys
crynodeb o fywydau a chyfraniadau pennaf y Cymry amlycaf erioed.
Er fod y llyfr yn cynnwys nifer o arwyr amlwg o wahanol feysydd
fel Dewi Sant, Owain Glyndwr, yr Esgob William Morgan a Dafydd
ap Gwilym mae rhan fwyaf o arwyr yr ugeinfed ganrif yn dod
o'r bod chwaraeon.
Mae'r awdur a'r hanesydd Alun Roberts yn amddiffyn ei ddewis:
"Dwi'n meddwl fod y llyfr yn adlewyrchu obsesiwn y Cymry
â chwaraeon yn yr ugeinfed ganrif. Efallai mai pregethwyr
oedd yr arwyr yn y ddeunawfed a'r bedwaredd ganrif ar bymtheg
ond dwi'n meddwl fod natur yr arwyr yn newid gyda'r oes."
|
|
Maen siwr bydd y llyfr yn arwain at drafodaeth, gyda amryw
mae'n debyg yn synnu o weld nad yw, ymhlith eraill, Dr William Price,
Arglwydd Tonypandi, Kate Roberts, Barry John a Gareth Edwards wedi'w
cynnwys.
Dywedodd Alun Roberts: "Dwi'n cydnabod mai dewis personol
yw hwn ac efallai ei fod yn adlewyrchu fy niddordebau a fy rhagfarnau.
O ran yr arwyr rygbi rhaid cofio fod Gareth Edwards a Barry John
wedi'w cynnwys mewn llyfr am Arwyr Rygbi a gyhoeddwyd gan Y Lolfa
yn ddiweddar."
Beth bynnag am y dadlau am bwy sydd fewn a phwy sydd mas mae Welsh
National Heroes yn lyfr ysgafn a difyr sydd hefyd yn addysgol, ac
mae'n siwr o ddiddori pobl y pethe ac ymwelwyr fel ei gilydd.
Welsh National Heroes
Alun Roberts
ISBN: 086243 610 9
Y Lolfa
£4.95
|